由答應調到這裡的那一刻開始, 就已經做了心理準備, 要和韓國人作戰. 會給他們折磨, 封殺..... 我跟他們有敵意, 而他們有的是殺意. 每次出招都好像要擊敗所有對手咁狠毒.

經過十三日的時間, 我的感覺不如想像中咁不安. 可能係因為早就知道時移世易, 走到那裡一樣會跟韓國人苦戰, 再無人間樂土可以去. 不如去一個環境好的地方作戰算了.

雖然這裡給夾攻的味道很濃烈. 不過我尚算捱得住. 唯一解釋係這裡好的東西太多, 足以中和了工作上的壓力.

尤其想到每日都可以跟一些好朋友眾面, 寒暄幾句已經鬆池好多. 有時聽到簡單的一句: "加油, 俾心機! 繼續爆數! " 即時注滿能量, 好有鬥志返去跟打靶Korea開戰.

走到那裡都會辛苦, 但這裡不會太苦澀, 我還是很留戀這個好地方.

今日放假要做的事多得很... 好在全部要處理的事都完成晒. 因為之後都唔會再有空閒時間.

當處理完所有野, 感覺成個人輕鬆晒, 可以心無雜念咁專注幾樣野:

由今日開始, 我會用最好的作戰狀態一直踩到平安夜. 這十日唔會再放假, 我要盡搶最後的黃金聖誕檔期.

然後到25號, 用我最好的狀態, 去和我一班摯友一同為池記的婚禮做到最好!!

還有快將回港的老朋友, 今次我一定要帶佢玩盡港九....

開工有開工忙, 收工為友情而忙.

一於開心到聖誕節啦~

今日剛好係回到那裡的第十日. 這十日的工作, 真的可以用享受來形容. 周圍都係我喜愛的事物. 連搭電梯的幾分鐘時間, 都會遇到一個曾經喜歡過的人, 都可以寒暄幾句. 又認識到唔少新朋友, 有不少都係戰鬥力極高的人, 可以跟他們同場較量. 彼此都擦出火花, 激發起最高的作戰狀態. 又不失識英雄重英雄的氣度, 更加係叫人喜悅.

或許我對上個月, 那一隊強陣訪港的日本隊實太難忘. 故此今日就算係全城注目的東亞運動會足球決賽- 香港對日本. 我也難以提起興趣.

食完lunch, 時間係四點左右, 周圍已經人山人海, 準備上山. 不過今日我只係路人甲, 沒有一齊上山的意慾.

而且揀係星期六下午開波, 我肯定唔會去得到.

不過都慶幸近期幾場波, 都吸引唔少人入場觀看.

銅鑼環的這間店, 我要用"潮店"去形容它, 特別的是每次路過. 它都是不同的主題, 中秋會變月餅店. 有時變成新手機的推銷店, 無一次會長時間. 通常個幾星期換一次. 而所換的都係當時極流行的產品.

而今日開始一連幾日, 它的主題, 亦係今個月其中一樣重量級產品.

於是我一收工即刻走來看看. 因為我一直係這東西的熱血fans.

史上最美麗的FINAL FANTASY13. 每一次出都係業界盛事, 一隻神級的大作. 每次都成為所有人談論的對象. 由細到大, 每一次知道它出續集, 就會定期留意新聞. 而每一次都給我留下極深刻回憶, 今次更加係第一次遇上Blu-Ray. 一向都係畫面超靚. 今次仲要係FUll HD, 已經有不少人會為它買PS3和高清電視, 仲有一個星期就會出. 日本/香港都會好震撼, 快樂的2009年12月, 還加上神級勁Game.

期待的故事, 期待的美麗.

這星期電視偶爾會播東亞運動會的片段. 不過同好多人一樣, 我完全沒有代入感覺. 一來參賽國家唔多, 變相又係得中國隊屈機. 又係那些吹捧中國運動員的場合, 這令我感到很反胃. 本來項目之中有足球. 可以出現日本對韓國這種夢幻戲碼. 不過最終他們派來都只係副選, 勝負已經不再重要.

我不喜歡, 人客亦不喜歡~ 所以有直播都無人留意. 更不會因此而想買機睇, 跟之前的幾個盛事: 世界盃/奧運的換機熱潮無得比.

當然我都係渴望有刺激消費的盛事發生. 幾時再有?? 行行下街, 俾我見到個展覽, 真係好吸引!!

等多六個月, 下一次換機熱潮會重現了!!

一直有種感覺, 我係個越夜越精神的人. 有時無單開, 我鍾意同人講: 我習慣係臨收工補時階段入波! 通常講左就會真係臨收工開記錄, 所以當其他人係最後一個鐘散晒等走人的時候. 我還是等待機會的降臨, 尤其係8點後, 才係我的黃金時段.

難得這個場旺夜市, 好夜都仲有好多人行, 簡直係為我度身訂做.

於是由聽日開始, 我返遲一個鐘, 收遲一個鐘, 盡搶夜市時段.

以前唔會咁做, 不過試下無壞. 反正今個月有咁多展覽, 收工點早都趕唔到. 不如早場去完先返工.

又可以訓到一點鐘先起身, 咁就可以睇波睇幾夜都唔怕啦~

真係一石二鳥的安排!!

三日時間, 這幾日真係不停的想起crossover這個字. 原因係太多刻骨詺心的icon人物係眼前出現. 有幾個年頭05,06,08. 有一些特別的icon人物, 隔左一段時間無見, 但如今一一重現....

幾乎係每個角落都有相熟的人. 本來一個客買野, 我帶去其他部門搵人幫手. 但左面的人對我曾經恩重如山, 右面的對我表現出楚楚可憐. 當我處於兩難局面的同時. 遠處有人望著我冷笑, 亦係一個經常嘲笑我的老朋友.

個個我都認識, 像是回家感覺, 係個商場走一走. 無故有人拍下我, 又係舊故人. 連老遠的沙田也有調到這裡!?

要回去始終要回去. 今日一去到迎接我的係兩個舊同事! 雖然隔左兩年時間, 但感覺仍舊親切, 我係個場數一數.... 其實真係好似大集合咁, 幾乎每個部門都有我認識的人. 不止係之前在這裡認識的, 有一些是在其他地方認識的. 今日大家有幸可以再在這裡重眾.

之後去食lunch, 我即時記起那間飯店, 我好鍾意去唔係因為好唔好食, 而係個氣氛好, 店員好nice, 我只有在這裡工作才會去.

本來想走多幾處地方搵下舊朋友. 不過今日太急趕, 只能揀路線去.

而最重要的紅顏知己. 今日都抽唔到時間去探下佢, 不過都唔緊要, 我又重回到港島區. 以後要見的機會多的是啦~

係一程短期內唔會再搭的回程列車裡. 突然想起好多舊面孔, 好多曾經交手的強敵, 好多艱苦與共的戰友.....

雖然已經係兩年前的事, 不過咁深刻的體驗, 唔會咁易忘懷.

以往Tea time只會去喝杯奶茶就算, 但在那個地方, 曾經真係會有人係我Tea time的時間, 給我送來一碗熱湯, 這份感覺真夠浪漫.

離開以後都沒有想過回去, 但緣份安排, 我又要再一次跟那裡連上了.

明日~ 我又再一次回到一個我熟識的地方, 或許那裡比任何一個地方都更適合我.

今個月肯定會有多難忘的事件發生. 雖然只有31日時間, 不過精彩的項目太多.... 有幾個日子更加係重量級!!

4, 9, 16, 17, 24, (25), 31

喜歡的人和事, 都係十二月出現.

除左5月之外. 12月就係我另一個看得最重的月份.

首先係聽晚的盛事, 全球注目. 已經有不少人談論著~ 我都好關心他們的命運會如何? 唔想好似上一次咁不幸.

下個星期開始, 要諗買禮物的事. 十二月生日的人真多.

來到這間店兩個月, 越來越發覺這裡好重街坊生意的味道. 可能附近無乜地方行, 所以好多客一有空就會入來搵人吹下水. 以往人客買完野就唔會再見, 但這裡的人真的會當你係friend. 買完野會得閒搵下你讚下部機, 又談天說地. 雖然好似好有人情味咁~ 不過我反而有點兒不適應!

以往身處的地方, 通常買野的人都係大忙人, 入黎講唔夠兩句就成事. 又或者係買得好隨便, 幾萬蚊當買件玩具, 唔鍾意就送俾人, 咁就更加唔會留意你講太多, 我都唔喜歡同人家閒話家常. 我最鍾意做快槍手, 極速開完再做其他野. 要搵話題同人吹, 我無這種本領. 唔好話同人客做friend. 有時遇到一些眼角高的人客, 他不會望我一眼, 我亦同樣唔會望這些"大支野". 但我心知佢一定係買野, 我亦一定可以搞掂佢. 只係全程大家唔會有一次eye contact,名符其實的No look sales.

依家一見有舊客入黎吹水, 我通常會扮忙, 等其他人走去慢慢同佢地吹, 我最憎做浪費時間的事情.

當時間去到十二月一日, 提醒了我一件事~

"清假期的時限已過!!"

我其實懶得去計有幾多日假還未放? 反正由年頭講到年尾. 我從一開始就預左唔會清得晒, 一早預左奉獻俾公司, 出來工作咁多年, 一直對假期看得很淡, 成日同老細重覆又重覆都係這句說話: 我年青力壯, 唔需要放咁多假, 寧願多些時間搏殺搵錢. 有錢無時間, 好過有時間無錢!!

於是這句話講到依家, 每年我都剩好多假期, 就算要去旅行, 我都可以放左工返屋企執行李, 第二日上機. 玩完返黎訓一覺, 第二日即刻開工, 可以無間斷的進行. 於是假期剩下剩下, 還是很多....

雖然我都想去多幾次旅行, 經濟上可以, 心態上可以, 體能上可以, 但工作上唔太容許我放太多假. 因為一放就炸左那個月的業績, 我唔會俾自己太多月份唔到數, 所以一個月會踩好多日工.

好耐無見過咁樣的跌市... 好似時光倒流返去一年前金融海嘯咁~ 前幾日睇個節目, 講到杜拜好似好風光咁. 原來經濟有咁多變數!?

唔係唔俾佢跌市, 不過係都唔好揀11, 12月啦!! 等咁耐先到聖誕檔期, 萬一俾股市拖跨, 就真係無妄之災.

如果下個月都咁靜, 咁又要用另一個方式搵錢, 趁手頭上有流動資金, 可以趁勢撈下平貨. 等個市反彈, 搵番筆快錢過肥年都不失為上策!

今日去食lunch, 個店員好有心咁介紹我食新野, 話佢地特製個新的蕃茄湯麵, 我見佢咁有誠意, 所以試下~ 都算係不過不失. 但可能先入為主, 太懷念之前係中環食個間老字號, 所以好難搵到其他取代到佢!

計番日子, 調左場有57日, 即是有57日無再食過那裡的蕃茄麵. 我的中環回憶, 最深印象要算係那碗蕃茄麵. 其實都算幾誇張的數字, 係中環一年, 有六成時間係那裡食, 好似做左我的飯堂咁~

當懷念一樣野, 就想去尋回它. 下個星期放假, 一於返去懷緬一下, 仲有上環間甜品店, 都係要一試再試的好地方. 雖然米芝蓮最終沒有選中他們, 不過係我心中, 他們都係一等一的好食府!!

近排的生活圍繞著都係一個又一個好朋友的婚宴. 雖然好多隔左好耐無聯絡, 不過友情都保存在最深刻的時間, 無被年月所沖洗. 婚宴上我有很深的體會!

而今日係25號, 剛好仲有一個月時間就係我一個摯友的大喜日子了. 而今次我又再一次好有幸咁被搵作做兄弟. 這是我的榮幸. 事隔幾年, 再一次做兄弟.

上一次我做得不算太好. 希望今次可以做得好一些, 令摯友的婚宴可以更加完美. 一個月時間要準備的東西, 一定係禮服跟儀容. 於是未來一個月, 要培養番正常的生活, 唔好夜訓, 唔好捱殘. 要有最好的心情去參與.

甚至乎我想貪心一些, 到時會見番好多舊同學. 我想係未來28日裡, 盡量做多些Mask, 試一試讓肌膚外表回到十八歲個陣, 回到那段青蔥歲月.

說實在的, 有時睇番朋友係facebook的近照, 有一些人我真的不覺他們有老過, 好似同畢業個時一模一樣的. 而我都一樣, 跟那時候一樣的單純真摯!

最近行過戲院和車站, 總被這張海報吸引著~

好好一個地方, 點解叫它做監獄? 印象中以旺角做題材的電影, 都有出現過. 旺角這個地方多姿多彩, 車水馬龍, 可以發生的事太多, 自然可以做電影題材.

我被海報吸引. 因為好奇它怎去描寫旺角? 我在這個地方一住就25年, 太多事情, 回憶跟這裡扯上關係. 雖然已經搬離了一年多, 不過每日收工. 總是回到旺角食完飯先再回家. 依然是那種旺角生活, 這裡有齊我喜愛的事物, 所有消遣都可以係旺角搵到. 暫時未有其他地方可以跟它相比. 曾經試做一份工, 派我係旺角店. 連返工都唔使去第二度, 我整整兩星期無離開過旺角.

如果說旺角是監獄. 其實我覺得係~ 它沒有困著你, 只係你會好留戀這一個地方, 不願意離開吧.

好多人會用相片做電腦/手機的wallpaper. 每次開機都會見到, 如果喜歡相中人, 一睇見就會覺得窩心.

我都一樣, 我會將喜歡的相片用作wallpaper, 特別係一些喜歡的人. 雖然感情已經由濃轉淡, 不過相片卻會記錄著最甜密的時間, 偶爾睇番, 都係一件開心的回憶.

依家部手機, 我擺左一張ex gf的相片做wallpaper. 好記得拍個陣她笑得幾甜密, 而拍照的時間係2008年8月, 我剛剛係奧運月超級爆數. 我跟她去了赤柱一間好正的餐廳, 同埋買左一份超級貴重的禮物給她. 那一刻我和她都很難忘!! 這張相係我咁多張相入面, 最鍾意的其中之一, 感覺上張相捕捉了她由心底裡散發出來的喜悅.

早來的寒冷天氣警告, 實在叫人吃不消.

原來天氣凍係最可怕! 足以暫停好多活動, 個個一收工即趕回家, 也難怪~ 走到街上寒風吹來, 凍到入心不是咁好受. 無論著幾多衫, 那種寒意都係擺脫不了, 勉強去頂. 最終可能也會捱出病來....

本來每日開工, 然後收工行街買下野, 睇下有冇新產品, 係我的生活習慣. 不過這陣子凍成咁, 都再無閒情日誌逛街, 我都係不喜歡凍的人.

或許真的太耐無睇過日本隊, 對上一次已經係九年前, 上次來的一隊波. 今次已完全換上另一隊人, 不過我的熱情依舊!

由三月知道日本會作客香港, 一直等今日的來臨. 雖然得十一度, 不過我一點也不覺冷, 還充滿熱情去等睇愛隊.

雖然今晚天氣唔算好, 不過都有萬三人入場, 看見好多一家大細咁去打氣, 這就是睇現場的吸引力.

這是真正的日本隊, 精銳盡出的日本隊. 連外流的歐洲戰將中村俊輔, 松井大輔都有黎, 50蚊張門票, 真係抵到爛.

今晚的意義~ 誰都知唔係勝負的問題? 旨在一睹亞洲巨星的風采, 我最主要係睇田中鬥莉王. 這個亞洲頂級進攻後衛, 打最後卻經常助攻, 作戰力真係爆燈, 連傳波都有好高水準.

而全場日本隊打得很悅目, 我後面的阿伯不停咁講.... 交下左又傳下右, 冷不提防一個直線傳入, 這是巴西波打法.

感激愛隊今晚俾我欣賞一場咁好的比賽, 亦係日本隊今年最後一場A級賽事, 而這班球員如無意外亦會係下年代表日本打世界盃, 我好高興有這一次機會睇咁多球星, 唔知幾時日本先會再咁齊人黎香港!?